Alaroye – powered by FeedBurner

0
Alaroye – powered by FeedBurner

FeedBurner makes it easy to receive content updates in My Yahoo!, Newsgator, Bloglines, and other news readers.

Learn more about syndication and FeedBurner…

A message from this feed’s publisher:

Current Feed Content

  • Akinrun: Idile Gbolẹru gba kootu lọ, wọn nijọba Ọṣun fẹẹ dabaru eto yiyan ọba

    Posted:Sat, 20 Nov 2021 13:48:40 +0000

    Florence Babaṣọla, Oṣogbo

    Idile ọlọmọọba Gbọlẹru, niluu Ikirun, nijọba ibilẹ Ifẹlodun, nipinlẹ Ọṣun, ti fori le kootu bayii lati ka ijọba ipinlẹ Ọṣun ati awọn afọbajẹ lọwọ ko lori ipinnu wọn lati mu Akinrun tuntun latidile Ọbaara.

    ALAROYE gbọ pe idile mẹta lo n jọba niluu Ikirun gẹgẹ bo ṣe wa ninu akọsilẹ. Idile Ọbaara lakọọkọ, ile Adedeji nikeji, nigba ti ile Gbolẹru jẹ ikẹta.

    Idile Adedeji ni Akinrun to waja ninu oṣu keji, ọdun yii ti wa, idi niyẹn ti idile Gbolẹru ṣe fọkan balẹ pe ọdọ awọn ni ọmọ-oye yoo ti jade.

    Koda, a gbọ pe awọn alakooso ijọba ibilẹ Ifẹlodun ti ṣepade pẹlu wọn, bẹẹ ni awọn eeyan ileeṣẹ to n ri si ọrọ ijọba ibilẹ ati oye-jijẹ ti ba wọn ṣepade.

    Afi bi ọrọ ṣe yi biri lọjọ karun-un, oṣu kọkanla, ọdun yii, nigba ti adajọ ile-ẹjọ giga ipinlẹ Ọṣun to kalẹ siluu Ikirun, Onidaajọ S. O. Falọla, kede pe latari gbun-gbun-gbun to wa laarin awọn ọmọ ile Gbolẹru, ki ijọba kọja si ile Ọbaara lati yan Akinrun tuntun.

    Idajọ yii jẹ iyalẹnu fun awọn araalu nitori ko si ẹni to beere iru ibeere bẹẹ niwaju ile-ẹjọ, bẹẹ ni wọn n sọ pe ko si ile ọlọmọọba ti oye kan ti ki i si gbun-gbun-gbun ko too di pe wọn yoo yanju rẹ laarin ara wọn.

    Nitori idi eyi ni ile Gbolẹru fi mori-le ile-ẹjọ nipasẹ awọn agbẹjọro wọn; G. A. Adeṣina, T. S. Adegboyega, S. B. Ajibade, Hasim Abioye, Olugbenga Fayẹmiwo ati Ọlasunkanmi Ladeji, sọ pe iyanjẹ patapata ni ti iru rẹ ba ṣẹlẹ.

    Wọn sọ pe ki ile-ẹjọ paṣẹ pe ki gbogbo nnkan ṣi duro daari na, kijọba ma ṣe gbe igbesẹ kankan lori idajọ tuntun naa, ki awọn afọbajẹ naa si dawọ duro.

    Wọn ni kile-ẹjọ too le sọ pe gbun-gbun-gbun wa laarin ile ọlọmọọba, o digba tijọba ba fun wọn lanfaani lati fa ọmọ-oye kalẹ, ṣugbọn ti wọn ko le fẹnu ko lori ẹni kan.

    Nigba to n sọrọ lori rẹ, Kọmiṣanna fun eto iroyin ati ilanilọyẹ araalu, Funkẹ Ẹgbẹmọde, sọ pe ijọba to bọwọ fun ofin nijọba awọn ati pe ohunkohun ti ile-ẹjọ ba sọ nijọba yoo tẹle.

  • Mi o mọ nnkan kan nipa iku Timothy, akẹkọọ Fasiti Ifẹ to sun si otẹẹli mi – Adedoyin

    Posted:Sat, 20 Nov 2021 13:41:53 +0000

    Florence Babaṣọla, Oṣogbo

    Alaga otẹẹli Hilton Hotel and Resorts to wa niluu Ileefẹ, Dokita Abdulramon Adegoke Adedoyin, ti sọ pe oun ko mọ nnkan kan nipa iku akẹkọọ Fasiti Ifẹ to di awati lẹyin to sun si otẹẹli naa.

    Ninu fọnran kan to n lọ kaakiri ori afẹfẹ ni Adedoyin ti sọ pe oun ti lowo lati nnkan bii ọdun mọkandinlogoji sẹyin, ko si si idi kankan ti oun fi nilo lati paayan tabi ṣe oogun owo gẹgẹ bi awọn kan ṣe n sọ kaakiri.

    O ni, “Emi Dokita Abdulramon Adegoke Adedoyin ki i ṣe apaayan tabi ẹni to n gbe eeyan ṣe oogun owo, Ọlọrun Ọba ti fun mi lowo mi latigba ti mo ti wa ni ọmọ ọdun mẹrinlelogun, titi ti mo fi di ọmọ ọdun marunlelọgọta bayii.

    “Mi o paayan ri o, Musulumi ododo ni mi, ẹni ti a n pe orukọ rẹ ni Timothy Adegoke gba yara si Hilton Hotel, Ileefẹ, ni Room 305, awọn ọmọ ti wọn gba a wọle si otẹẹli wa ko san owo sinu otẹẹli, ko si si akọsilẹ pe oun gan-an san owo sinu akanti Wema Bank ti a n lo, a ko waa mọ nnkan to ṣẹlẹ ti wọn fi gba a wọle lai jẹ pe o san owo sinu akanti ileeṣẹ, ti wọn si gba a sinu akanti ti ara wọn.

    “Igba ti awọn ọlọpaa n wa Timothy Adegoke ni mo too mọ pe nnkan kan ṣẹlẹ nileetura Hilton. Nigba ti wọn si ṣe iwadii, wọn ri oku Timothy nibi ti wọn ju u si, gbogbo awọn ọlọpaa ti wọn wa nibẹ ni wọn wo ẹya-ara rẹ, wọn si ri i pe ẹyọ nnkan kan ko din nibẹ, lati le fidii rẹ mulẹ pe ko si ẹni to ran ẹnikankan lati yọ ẹya-ara rẹ.

    “Mo rọ gbogbo eniyan nile, loko, alejo, ara-ile pe ki wọn ni suuru, ki wọn jẹ ki ọlọpaa ṣe iwadii daadaa. Ti ẹ ba wo o daadaa, ẹ maa ri i pe Ileefẹ ni mo ti bẹrẹ gẹgẹ bii ẹni to n ṣe lẹsinni fun awọn ọmọ ninu ile, ki n too da Universal College of Technology silẹ, mo ṣe The Polytechnic, mo ṣe Fasiti.

    “N ko kuro niluu Ifẹ ti Ọlọrun Ọba fi da mi lọla, to si fun mi ni owo tutu, ki i ṣe owo-ẹjẹ, ki i ṣe owo buruku, ẹ jọwọ, ki ẹnikẹni ma ṣe ro buruku si mi o. Emi ni Dokita Abdulramon Adegoke Atọbatẹlẹ Adedoyin, Mayẹ ti ilẹ Ifẹ, Mayẹ ti ilẹ Yoruba. Ẹ ṣe o.”

  • Transifọma lawọn eleyii lọọ ji tu tọwọ fi ba wọn

    Posted:Fri, 19 Nov 2021 15:38:32 +0000

    Faith Adebọla

    Alaye ohun tawọn gende meji atawọn ọmọde mẹta yii ro ti wọn fi lọọ tu ina ẹlẹntiriiki kuro lori transifọma to wa lagbegbe Lapai-Gwari, nipinlẹ Niger, ti wọn si gbe ẹrọ amunawa ọhun pẹlu awọn waya rẹ, lo ku ti wọn n ṣe lọwọ lakolo awọn agbofinro ti wọn wa bayii.

    Orukọ ati ọjọ-ori awọn maraarun ni Suleiman Zubairu, ọmọọdun mẹrindinlogun (16), Mustapha Umar ati Mande Magaji tawọn mejeeji jẹ ẹni ọdun mẹtadinlogun (17), Hussaini Adamu, ẹni ọdun mẹtalelogun (23), ati Salisu Usman, ẹni ọdun mẹẹẹdọgbọn (25). Wọn laduugbo Kasunwa-Gwari, niluu Minna, nipinlẹ ọhun, ni gbogbo wọn n gbe.

    DSP Wasiu Abiọdun to jẹ Alukoro ileeṣẹ ọlọpaa ipinlẹ naa sọ pe opin ọsẹ to kọja lọwọ awọn ọlọpaa ẹka Chachanga tẹ awọn afurasi naa nigba ti wọn n ṣe patiroolu, wọn ba awọn afurasi ole naa nibi ti wọn ti n ṣeto lati gbe ẹru ole nla naa lọ, o ni Salisu Usman lo gba awọn waya naa lọwọ wọn lati ba wọn ta a.

    Abiọdun ni bi wọn ṣe ko wọn de teṣan ọlọpaa lawọn afurasi naa ti n ka boroboro pe loootọ lawọn ji transifọma ati waya atawọn eroja abanaṣiṣẹ ti wọn ba lọwọ wọn. Wọn tun jẹwọ pe transifọma keji tawọn n tu lọwọ ni wọn ka awọn mọdii ẹ yii.

    Alukoro ọlọpaa ni iwadii ṣi n tẹsiwaju lori wọn, gbogbo wọn lo si maa foju bale-ẹjọ. O lẹsun ole jija, idigunjale ati igbimọ lati huwa ọdaran lawọn maa fi kan wọn. O tun gba awọn araalu lamọran lati maa ṣọ ẹrọ amunawa to ba wa laduugbo wọn.

  •  Ọwọ Amọtẹkun tẹ awọn gbaju-ẹ marun-un l’Akurẹ

    Posted:Fri, 19 Nov 2021 15:28:40 +0000

    Oluṣẹyẹ Iyiade, Akurẹ

    Ẹsọ Amọtẹkun ipinlẹ Ondo ti fi pampẹ ofin gbe awọn afurasi onijibiti marun-un ti wọn n ṣọṣẹ lagbegbe Ọja ọba, niluu Akurẹ.

    Meji ninu awọn ọdaran ọhun, Ojo Dausi ati Francis Okorocha, lọwọ kọkọ tẹ lẹyin ti wọn ji ọmọbinrin kan ti wọn porukọ rẹ ni Ẹniọla Adedipẹ gbe lọ si ọfiisi wọn, nibi ti wọn ti fi oogun abẹnu gọngọ gba gbogbo owo to wa ninu asunwọn ile-ifowopamọ rẹ.

    Ninu alaye ti obinrin naa ṣe fun akọroyin wa, o ni lẹyin tawọn afurasi ọhun fi nnkan gba oun nikun lẹẹmẹta loun bẹrẹ si i tẹle wọn, ti oun si n ṣe ohun kohun ti wọn ba ti ni ki oun ṣe.

    Ile kan ti wọn pe lọfìisi ni wọn kọkọ mu un lọ, nibẹ lo ti sọ nọmba aṣiri kaadi ipọwo rẹ fun wọn, eyi to fun wọn lanfaani lati lọọ gba ẹgbẹrun lọna ọgọrun-un Naira jade ninu asunwọn banki rẹ.

    O to bii wakati mẹfa daadaa to ti pada de ile rẹ ki iye rẹ too ṣi pada, kiakia lo lọọ fi iṣẹlẹ naa to awọn ẹsọ Amọtẹkun leti, ti wọn si gbe igbesẹ ati fi pampẹ ofin gbe Ojo, Okorocha atawọn ẹgbẹ wọn mẹta mi-in.

    Alakooso agba fun ẹsọ Amọtẹkun nipinlẹ Ondo, Adetunji Adelẹyẹ, fidi iṣẹlẹ naa mulẹ, o ni o ti le lọdun marun-un tawọn afurasi tọwọ tẹ ọhun ti wa lẹnu iṣẹ jibiti lilu.

    Ọpọlọpọ awọn eeyan agbegbe  Ọja Ọba, Old Garage, Aafin Deji ati Cathedral, niluu Akurẹ, lo ni wọn ti foju wina ọkan-o-ọkan ọṣẹ ti wọn n ṣe.

    O ni awọn ṣi n tesiwaju ninu iwadii awọn lori awọn ẹsun ti wọn fi kan awọn mararun-un.

  • Awọn agbaagba ilẹ Ibo ṣepade pẹlu Buhari, o loun yoo wa nnkan ṣe sọrọ Nnamdi Kanu

    Posted:Fri, 19 Nov 2021 15:26:08 +0000

    Faith Adebọla

     Aarẹ Muhammadu Buhari ti ṣeleri fawọn agbaagba ilẹ Ibo lati iha Guusu/Ila-Oorun Naijiria pe oun maa ṣagbeyẹwo ẹbẹ wọn lati tu gbajugbaja ajijangba ilẹ Ibo nni, Ọgbẹni Nnamdi Kanu, silẹ laipẹ.

    Ọrọ yii waye ninu ipade nla kan tawọn eeyan jannkan jannkan lati agbegbe naa ṣe pẹlu Buhari lọjọ Ẹti, Furaidee yii, lasiko abẹwo wọn si ile ijọba, l’Abuja, olu-ilu ilẹ wa. Aṣofin ati minisita feto igboke-gbodo ọkọ ofurufu (Aviation) nigba kan, Oloye Mbazulike Amaechi, ẹni ọdun mẹtalelaaadọrun-un (93), lo ṣaaju wọn.

    Awọn agbaagba naa, ti wọn pera wọn ni ‘Awọn agbaagba ẹni ọwọ ju lọ nilẹ Igbo’ (Highly Respected Igbo Greats) tilẹkun mọri ṣepade pẹlu Aarẹ fun bii wakati kan gbako, wọn ni pataki ọrọ ti wọn ba wa ni iṣoro eto aabo to n gogo si i lagbegbe ilẹ Ibo, ati ọrọ awọn ajijangbara IPOB ti wọn lawọn n ja fun yiya orileede Biafra kuro lara Naijiria ati idasilẹ olori wọn, Ọgbẹni Kanu.

    Gẹrẹ tipade naa pari ni Oludamọran pataki si Aarẹ lori eto iroyin ati ipolongo, Ọgbẹni Fẹmi Adeṣina, ti fi atẹjade lede lori lajori ipade naa, o ni lẹyin ti Buhari ti gbọ ọrọ ati ẹbẹ awọn agbaagba naa tan, o sọ fun wọn pe ibeere ka-n-ka ni ẹbẹ wọn lori ọrọ Nnamdi Kanu, ṣugbọn oun maa ṣiṣẹ lori ẹ sibẹ, lati jẹ ki alaafia pada bọ sipo lagbegbe ilẹ Ibo, kawọn ọdọ tinu n bi si lọọ fọkan lelẹ.

    Buhari sọ fun wọn Oloye Amaechi pe: “Ẹbẹ ka-n-ka to kaayan laya ni ẹbẹ tẹẹ waa bẹ mi yii gẹgẹ bii olori orileede yii, ohun tẹẹ fẹ ki n ṣe yii lagbara gidi. Lati ọdun mẹfa ti mo ti wa lori aleefa iṣakoso orileede yii, ko sẹni to le naka abuku si mi pe mo da sọrọ ile-ẹjọ tabi igbẹjọ to n lọ lọwọ ri. Ṣugbọn Ọlọrun ti fun yin ni iru laakaye yii, o si ti pa yin mọ pẹlu ọpọlọ pipe, tori awọn mi-in ti o ju idaji ọjọ-ori yin lọ sibẹ ti wọn o mọ eyi to kan, tori bẹẹ, ma a ṣiṣẹ lori ẹbẹ yin, ma a ronu lori ẹ daadaa.”

    Fẹmi ni Baba arugbo kujọkujọ naa, Amaechi, parọwa pe ki Buhari yọnda Nnamdi Kanu foun, ko si fọrọ rẹ ya oun, ki wọn yanju awọn ẹsun ti wọn ka si i lọrun nitubi-inubu lọna ti oṣelu dipo ti ologun, Buhari si ti ṣeleri pe oun yoo wa nnkan ṣe si i.

    Lara awọn eeyan nla nla ti wọn wa nipade naa ni Gomina ipinlẹ Anambra nigba kan, Oloye Chukwuemeka Ezeife, Biṣọọbu agba ijọ Mẹtọdiisi, Sunday Onuoha, Amofin Goddy Nwazurike, Aarẹ ẹgbẹ awọn agba ilẹ Ibo tẹlẹ, Aka Ikenga, ati awọn agbaagba mi-in.

  • Nitori aabo to mẹhẹ, awọn aṣofin Ogun ni ki gomina fofin de kanifa ati banga

    Posted:Fri, 19 Nov 2021 15:19:23 +0000

    Adefunkẹ Adebiyi, Abẹokuta

    Lati le gbegi dina wahala to maa n waye nibi ayẹyẹ opin ọdun ti wọn n pe ni kanifa, ati jiju banga to maa n ro gbamu bii ibọn, to si ṣee lo fawọn oniṣẹ ibi, ile-igbimọ aṣofin Ogun ti parọwa si Gomina Dapọ Abiọdun pe ko fofin de ayẹyẹ opin ọdun ti wọn maa n ṣe kiri adugbo, ko si tun fofin de banga yinyin pẹlu, nitori aabo ko fi bẹẹ si lasiko yii debi teeyan yoo tun maa ki ọwọ ara ẹ bọ ṣọọlọ.

    Nibi ijokoo awọn aṣofin to waye lọfiisi wọn l’Oke-Mosan, lọsẹ to kọja, ni wọn ti fẹnuko si aba yii, iyẹn lẹyin ti olori ọmọ ẹgbẹ to pọ ju lọ, Ọnarebu Yussuf Sheriff, ti ṣide eto, ti Ọnarebu Sylvester Abiọdun to n ṣoju ẹkun Ariwa Ijẹbu naa si kin in lẹyin, ko too di pe gbogbo awọn aṣofin naa waa fọwọ si i.

    Gẹgẹ bawọn aṣofin yii ṣe sọ, o ṣe pataki pe kijọba so ọdun kanifa naa kọ, nitori yoo koba eto aabo, o tun le jẹ ki Korona gbilẹ si i nibi ti wọn ba ti n ṣe ohun ti aisan naa ko fẹ.

    Awọn aṣofin sọ pe gbogbo kanifa ti wọn ti ṣe sẹyin ko bimọ ire ri, afi jagidijagan to le da omi alaafia ilu ru, to si tun maa n mu ẹmi awọn ẹlomi-in lọ.

    Nigba to n gba aba naa wọle, Abẹnugan ile ti i ṣe Ọnarebu Ọlakunle Oluọmọ, sọ pe fun anfaani ipinlẹ Ogun ati ijọba lawọn ṣe da aba yii.

    O ni ile-igbimọ yii ko ni i faaye gba iwa janduku kankan labẹ kanifa ṣiṣe. Oluọmọ sọ pe ohun ti yoo di alaafia to wa nipinlẹ yii lọwọ ni kanifa ati banga yinyin, awọn ko si ni i faaye silẹ fun ayẹyẹ ti yoo tun mu Koro gbilẹ si i.

    Lẹyin ti gbogbo ile-igbimọ fọwọ si aba yii tan, Oluọmọ taari ẹ si Akọwe ile, Ọgbẹni Deji Adeyẹmọ, pe ko taari aba naa si ọfiisi Gomina Dapọ Abiọdun, ati sọdọ awọn ẹṣọ alaabo gbogbo.

  • Saheed to fipa ba ọmọọdun mẹrinla laṣepọ foju bale-ẹjọ

    Posted:Fri, 19 Nov 2021 12:51:00 +0000

    Faith Adebọla, Eko

    Ahamọ ẹwọn Kirikiri, l’Ekoo, nile-ẹjọ Majisreeti to wa n’Ikẹja paṣẹ pe ki wọn fi baale ile ẹni ọgbọn ọdun, Saheed Safuraini, si. Ọmọ ọdun mẹrin ni wọn lo fipa ba laṣepọ.

    Ijọba lo wọ afurasi ọdaran naa re’le-ẹjọ latari bawọn obi ọmọbinrin ti wọn forukọ bo laṣiiri kan ṣe waa fẹjọ ẹ sun pe o ṣakọlu sọmọ awọn lọjọ kọkandinlọgbọn, oṣu kẹwaa, ọdun yii, to si fipa ṣe kinni fọmọbinrin naa.

    Gẹgẹ bi alaye ti Agbefọba Kẹhinde Ajayi ṣe ni kootu ṣe lọ, o ni iwadii tawọn agbofinro ṣe fihan pe loootọ ni afurasi ọdaran yii ṣe ọmọ ọlọmọ baṣubaṣu, ayẹwo tawọn dokita si ṣe lẹyin naa fihan pe ẹnikan ti huwa aidaa sabẹ ọmọbinrin ọhun.

    O ni lasiko tọmọbinrin ọhun n lọọ jiṣẹ tawọn obi rẹ ran an lọjọ naa lafurasi ọdaran yii fọgbọn tan an wọle rẹ to wa ni Opopona Ida-Aba, lagbegbe Ẹpẹ, nipinlẹ Eko, o niwa ọdaran naa ta ko ofin iwa ipinlẹ Eko, o si tun da omi alaafia adugbo naa ru.

    Afurasi ọdaran loun ko jẹbi, o si rawọ ẹbẹ si adajọ kootu naa, Abilekọ A. O. Ajibade, pe ko yọnda foun lati maa tile waa jẹjọ.

    Ṣugbọn Adajọ Ajibade ni ki wọn da a pada sẹwọn titi di ọjọ kẹsan-an, oṣu kẹwaa, ti igbẹjọ yoo maa tẹsiwaju. O ni ki wọn ko faili ẹjọ naa lọ si ẹka to n fawọn adajọ nimọran.

  • Agbẹjọro to fọbẹ gbigbona jo ọmọ aburo ẹ lara tori ẹẹdẹgbẹta Naira ti dero ẹwọn

    Posted:Fri, 19 Nov 2021 12:37:31 +0000

    Faith Adebọla

     Tori ko sẹni ti ida ofin ko le ge, Abilekọ Aina Ọdetayọ, ẹni ọdun marundinlogoji, to n ṣiṣẹ lọọya ti dero atimọle ọgba ẹwọn, ile-ẹjọ Majisreeti lo paṣẹ bẹẹ l’Ọjọbọ, Tọsidee yii, latari ẹsun ti wọn fi kan obinrin naa pe ika ati ọdaju ẹda ni, wọn lo fi ọbẹ gbigbona jo ọmọ aburo ẹ lara, ọmọ ọdun mejila pere, o lo ji oun lowo.

    Ẹsun mẹta ọtọọtọ, to da lori ṣiṣe akọlu si ọmọde, didọgbẹ si ni lara ati kikuna lati tọju ẹmi ọmọde ni wọn fi kan obinrin naa nile-ẹjọ Majisreeti to wa ni Igbosere, lagbegbe Tinubu, l’Erekuṣu Eko, naa.

    Agbefọba, Inpẹkitọ Micheal Unah ṣalaye pe Ojule kẹtala, Ẹsiteeti Green Hill, to wa l’Agege, ni Lọọya Ọdẹtayọ ati ọmọde to ṣe leṣe naa n gbe, ọjọ Aiku, Sannde ọsẹ to kọja, lọjọ kẹrinla oṣu kọkanla yii niṣẹlẹ naa waye.

    Unah sọ ni kootu pe: “Olujẹjọ yii ti kọkọ fibinu lu ọmọ ti o ti i toju u bọ yii lalubami lọjọ naa, latari ẹsun to fi kan an pe ọmọ ọhun lo maa ji oun lowo, ẹẹdẹgbẹta naira (N500), tori awọn meji naa lawọn jọ n gbe, lẹyin eyi lafurasi ọdaran yii fi ọbẹ sori ina gaasi ẹ, lo ba fi ọbẹ gigbona naa jo ọmọ ọlọmọ lara kaakiri.

    Ati pe lẹyin ti ọmọ naa n kerora, to n joro ọgbẹ buruku yii, afurasi ọdaran yii taku lati gbe e lọ sọsibitu fun itọju iṣegun, o lo gbọdọ jiya ẹṣẹ ẹ daadaa.”

    Oluwa mi, awọn ẹsun ta a fi kan afurasi ọdaran yii ta ko isọri kẹwaa, ikejila ati ikẹtala iwe ofin ẹtọ awọn ọmọde nipinlẹ Eko, ti wọn ṣe lọdun 2019.”

    Olujẹjọ naa sọ pe oun ko jẹbi awọn ẹsun mẹta ti wọn fi kan oun, o loun ni alaye lati ṣe.

    Adajọ kootu naa, Ọgbẹni Azeez Alogba, ni ki wọn fi afurasi ọdaran naa si ọgba ẹwọn, ṣugbọn o faaye beeli silẹ fun un to ba mu iwe aṣẹ to fi n ṣiṣẹ lọọya wa, ati oniduro meji. Obinrin naa niwee-aṣẹ oun ko si nitosi, lo fi dero ẹwọn.

  • Wọn lọmọbinrin yii lọọ ṣere fawọn ọlọjọọbi leti okun Eko, lo ba ku somi

    Posted:Fri, 19 Nov 2021 12:09:00 +0000

    Faith Adebọla, Eko

     Ọdọmọbinrin ẹni ọdun mọkanlelogun kan, Michelle Abẹṣin, oṣere to n ṣiṣẹ DJ lode ariya, ti pade iku ojiji nibi ariya ọjọọbi kan to lọọ ṣere fun wọn l’Ọjọbọ, Tọsidee yii, niṣe lo ri somi letikun, lo si ṣe bẹẹ doloogbe.

    Iṣẹlẹ yii la gbọ pe o waye nirọlẹ Ọjọbọ, Tọsidee, ọsẹ yii, letikun Lẹkki Beach, lagbegbe Lẹkki, nipinlẹ Eko.

    Wọn ni ọkan lara awọn mọlẹbi ọmọbinrin yii lo fẹẹ ṣayẹyẹ ọjọọbi ẹ, Lẹkki Beach yii ni wọn dana ariya ọhun si, ti oloogbe naa fi si n ba wọn gbe orin aladun ọlọkan-o-jọkan si i, gẹgẹ bii iṣẹ rẹ.

    Wọn lawọn ọrẹ ọlọjọọbi kan ni wọn ni kawọn lọọ ya fọto ati fidio ninu alagbalugbu omi okun ki kinni naa le tubọ larinrin, DJ Michelle si ba wọn lọ, ṣugbọn omi okun ti ki i figba kan parọrọ lo n ru bọ bo ṣe maa n ṣe, igbi omi naa si lagbara debi to fẹẹ gba foonu ti wọn fi n ya fidio, koloju too ṣẹju, wọn lọmọbinrin to doloogbe yii ṣubu somi, ko si ṣee ṣe fawọn to ku lati fa a jade, ki igbi omi mi-in too kan wọn lara, ni Michelle ba ri somi.

    Titi dasiko yii, wọn o ti i ri oku rẹ fa jade, bo tilẹ jẹ pe awọn pẹjapẹja kan ti n ṣiṣẹ lati ba wọn wa oku ọhun.

    Aburo oloogbe naa, Stella Abesin, kọ ọrọ aro nipa ẹgbọn rẹ sori ikanni Instagiraamu rẹ, pe: “Eyi o tọ si ẹgbọn mi o, ha, mi o le mi mọ. Gbogbo wọn waa n woran bi omi okun ṣe gbe ẹgbọn mi lọ, Ọlọrun Ọba o, nibo larabinrin mi wa. Nibo ni oku ẹ wa?”

    Bẹẹ naa lawọn ọrẹ ati ololufẹ oloogbe naa fi iyalẹnu wọn han si iku airotẹlẹ rẹ yii, wọn si ṣedaro ẹ loriṣiiriṣii, ṣugbọn ẹpa ko boro mọ, akọyinsi ẹni to ku ki i gbọ oriki.

    Alukoro ileeṣẹ ọlọpaa Eko, CSP Adekunle Ajiṣebutu, ko ti i fidi iṣẹlẹ yii mulẹ, tori ko fesi si ipe ta a pe e ati atẹjiṣẹ ta a fi ṣọwọ si i.

  •  Ẹ woju Taiwo, ayederu ṣọja tọwọ tẹ l’Okitipupa

    Posted:Fri, 19 Nov 2021 11:43:09 +0000

    Oluṣẹyẹ Iyiade, Akurẹ

    Ayederu sọja kan, Lawal Taiwo, lọwọ awọn agbofinro tẹ niluu Okitipupa lọsẹ to kọja.

    ALAROYE  gbọ pe adugbo Togbe, lagbegbe Agege, ni Taiwo n gbe l’Ekoo. Ọjọ Aje, Mọnde, ọsẹ yii, lọwọ awọn ọmọ ogun ti wọn ṣẹṣẹ ko lọ si agbegbe Okitipupa fun akanṣe iṣẹ tẹ ẹ pẹlu aṣọ sọja tuntun lọrun rẹ.

    Afurasi ọdaran ọhun lọwọ palaba rẹ ṣegi lasiko to waa fi ara rẹ han afẹsọna rẹ to n gbe l’Okitipupa gẹgẹ bii ọkan ninu awọn ṣọja Naijiria.

    Ninu ifọrọwerọ ta a ṣe pẹlu rẹ, alaye to ṣe fun wa ni pe oun ki i jale, bẹẹ ni ko sẹni ti oun fiya jẹ lọna aitọ ri latigba toun ti n dibọn bii sọja.

    O ni ọjọ pẹ ti iṣẹ naa ti n wu oun lati ṣe, ṣugbọn ti wọn ki i mu oun nigbakuugba ti wọn ba n ṣeto igbani ṣiṣẹ ologun.

    Nigba to si ti gbiyanju titi ṣugbọn ti ko rẹni ran an lọwọ lo pinnu ati lọọ ge aṣọ ati bata awọn ṣọja funra rẹ, èyí tó ń wọ kiri kawọn eeyan le ro pe ọkan ninu awọn sọja Naijiria ni.

    Alukoro ileesẹ ọlọpaa ipinlẹ Ondo, Ọdunlami Funmi, ni iwadii awọn ṣi n tẹsiwaju lori ẹsun ti wọn fi kan Taiwo, o ni ayederu ṣọja naa ko ni i pẹ foju bale-ẹjọ lẹyin ti iwadii ba ti pari lori ọrọ rẹ.

LEAVE A REPLY

Please enter your comment!
Please enter your name here